Mjög vel var mætt á fræðslufund FNS sem haldinn var í Fjölbrautaskólanum við Ármúla 10. nóvember s.l.  og bar yfirskriftina „Hvernig er best að kynna námsframboð í framhaldsskólum?“
Greinilegt er að náms- og starfsráðgjafar hafa mikinn áhuga á að ræða hvernig best er að haga kynningarmálum  þegar kynna skal námsframboð fyrir nemendum í 10. bekk og foreldrum þeirra og hvað má bæta í þeim efnum.

Nokkrir náms- og starfsráðgjafar í grunn- og framhaldsskólum sögðu frá sinni reynslu og voru eftirfarandi punktar til grundvallar jafnframt því sem umræður sköpuðust jafnóðum:
  Fjöldi hverfakynninga?
  Samráð um dagsetningu?
  Tímasetning; vikudagur og tími dags.
  Lengd kynninga
  Auglýsingar hverfakynninganna? T.d. til nágrannasveitafélaga og landsbyggðar?
  Á að bjóða fleiri stofnunum og skólum að kynna sitt nám á hverfakynningum? T.d. Mímir, Námsflokkarnir, IÐAN fræðslusetur, Lögregluskólinn, Keilir.
  Annað ….

Almennt voru flestir náms- og starfsráðgjafar mjög ánægðir með þá þróun að hafa hverfakynningar og töldu þær markvissari og gefa foreldrum kost á að kynna sér skólana. Fundargestir töldu heppilegast að miða lengd hverfakynninga við 1 og 1/2 -2 tíma og hafa þær á tímabilinu 16.30-19.00. Bent var á mikilvægi þess að náms-og starfsráðgjafar væru á staðnum allan þann tíma sem kynningin hefði verið auglýst, búið væri að koma kynningarbásnum upp fyrir auglýstan tíma og náms- og starfsráðgjafar færu ekki fyrr þó aðsókn væri dræm. Sumir nemendur koma síðasta hálftímann og eiga þá auðvitað ekki að grípa í tómt.   Bent var á að ekki væri víst að allir nemendur væru virkir í svo stórum kynningum sem hverfakynningar eru og einnig nefnt að með heimsóknum í skólana eins og áður var hefði náms- og starfsráðgjafinn líka fengið ágæta kynningu á viðkomandi skóla og því um leið mikilvægar upplýsingar um námsframboð hverju sinni.

Langflestir nefndu að opnu húsin væru gagnleg og gott tækifæri fyrir verðandi nemendur og foreldra þeirra að koma saman og kynna sér skólann og jafnframt oft möguleiki fyrir nemendur utan að landi að nýta sér þau. Þó var einnig bent á að stundum misstu opnu húsin marks og væru ekki nógu vel sótt. Í því sambandi spunnust umræður um á hvaða tíma vænlegast væri að hafa opið hús .

Auðvitað eru bæði kostir og gallar við skólaheimsóknir, hverfakynningar og opin hús og ýmislegt sem hefur áhrif á hvað nemendur telja að henti best.

Gamla hugmyndin um stóra sameiginlega kynningu bar á góma og lýstu nokkrir áhuga sínum á að hún næði fram að ganga og m.a. bent á að það væri ákjósanlegur  vettvangur fyrir nemendur utan að landi til að kynna sér námsframboð á framhaldsskólastigi. Í þessu samhengi var rifjað upp að síðast liðið vor var kynning, svonefnd námsmessa,  í Laugardalshöll á námsframboði í framhalds- og háskólum landsins fyrir ungt fólk og atvinnuleitendur  og tókst hún mjög vel að flestra mati.

Mikilvægt er að hafa aðgengilegt yfirlit yfir allar kynningar í framhaldsskólunum svipað því og gert var í fyrra yfir öll opnu húsin og setja á heimasíðuna (gera yfirlit yfir bæði kynningar og opin hús). Í því sambandi kom fram tillaga um að setja á stofn hóp sem sæi um að skipuleggja kynningar með góðum fyrirvara og gæta þess að bæði kynningar og opin hús dreifðust jafnt og þétt til að koma í veg fyrir að margar kynningar röðuðust á t.d. eina viku. Einnig var bent á að það væri  til hagsbóta fyrir alla að hafa aðgengilegar á einum stað (t.d. heimasíðu félagsins) helstu upplýsingar um hvern framhaldsskóla fyrir sig svo náms- og starfsráðgjafar í grunnskólum og nemendur 10. bekkjar gætu kynnt sér inntökureglur og fleira sem skiptir þá máli þegar verið er að kynna sér framhaldsskóla og námsframboð þeirra. Þarna væri kjörið tækifæri fyrir skólana að kynna sérstöðu sína og nýjar námsbrautir. Einnig kom fram að þörf væri á kynningarefni um starfsbrautir. Þess eru dæmi að skólar séu með kynningarefni á heimasíðu sinni, t.d. Tækniskólinn.  Niðurstaðan varð að nýta mætti betur heimasíðu FNS fyrir kynningarefni á námsframboði og aðrar þarfar  upplýsingar  fyrir náms- og starfsráðgjafa í starfi.

Kristrún Birgisdóttir náms- og starfsráðgjafi sem starfar í mennta –og menningarmálaráðuneytinu og sér  um innritun sagði að algengt væri að nemendur ættu í erfiðleikum með innritun. Því gæti verið góð viðbót á kynningunum að þar sé einhver til að kynna Menntagáttina en verið er að endurnýja hana og mun ný og endurbætt Menntagátt verða tekin í notkun í desember. Spurt var af hverju innritun nemenda á starfsbraut sé svo miklu fyrr heldur en önnur innritun og ástæðan sögð sú að skólarnir þurfa að vita með góðum fyrirvara um þá nemendur sem munu innritast á starfsbrautir skólanna til að geta undirbúið komu þeirra. Kristrún sagði að fjölmargir nemendur nýti sér facebook síðuna um innritun og þar svari hún spurningum sem brenna á nemendum.

Elín Thorarensen náms- og starfsráðgjafi sem einnig starfar í mennta- og menningarmálaráðuneytinu sagði að ráðuneytið stæði fyrir fundaröð um starfsmenntun. Í tengslum við þessa fundi fer fram umræða um náms- og starfsráðgjöf og fulltrúum náms- og starfsráðgjafa  boðið á fundina enda eitt markmið þeirra að ræða hvernig gera má starfsnám sýnilegra og hvetja nemendur  til að kynna sér fjölbreytt nám og námsleiðir. Hún nefndi að foreldrar (nefndi mæður sérstaklega)þyrftu einnig að fá kynningu á námsframboði því skoðanir þeirra hefðu áhrif á val unglinganna og nýta þyrfti nútíma tækni betur við kynningar svo þær vektu áhuga unglinganna.

Umræður  spunnust um náms- og starfsfræðslu og nauðsyn þess að hefja hana fyrr en gert er. Auka þarf fræðslu um iðn- og verkgreinar og í því sambandi er m.a. rætt um að vanti kynningarefni á öðru formi en bókaformi. Þó hafa verið gefin út myndbönd og fleira og á heimasíðu IÐUNNAR fræðsluseturs eru upplýsingar um nám og störf í iðngreinum en námsráðgjafar á fundinum kölluðu eftir frekara efni til að kynna iðn- og starfsnám. Í boði er fjölbreytt nám og nauðsynlegt að náms- og starfsráðgjafar kynni sér það vel og miðli til nemenda en til þess þarf að vera  kynningarefni til staðar. Nefnt var að vekja þyrfti meiri athygli á Iðnnemakeppninni sem haldin er hér á landi og mætti t.d. líta til World Skills keppninnar sem haldin er árlega. Sú keppni er mjög vinsæl meðal barna og unglinga á öllum aldri sem finnst spennandi að fylgjast með keppendum keppa í hinum ýmsu iðngreinum og opnar það augu þeirra fyrir fjölbreyttum starfsvettvangi iðnmenntaðra.

Fundi var slitið og greinilegt að náms- og starfsráðgjöfum liggur ýmislegt á hjarta varðandi kynningarmál á námsframboði framhaldsskólanna.